ತೂಕ ಇಳಿಕೆಗಾಗಿ ವಾಕ್‌ ಮಾಡುತ್ತಿದ್ದೀರಾ, ನೀವು ಅರಿಯಲೇ ಬೇಕಾದ ಸಂಗತಿಗಳಿವು.

0
4049

ತೂಕ ಇಳಿಕೆಗಾಗಿ ವಾಕ್‌ ಮಾಡುತ್ತಿದ್ದೀರಾ, ನೀವು ಅರಿಯಲೇ ಬೇಕಾದ ಸಂಗತಿಗಳಿವು. ನಡಿಗೆಯ ಮೂಲಕ ಎಷ್ಟು ತೂಕವನ್ನು ಕಳೆದುಕೊಳ್ಳಬಹುದೆಂಬ ವಿಚಾರವು ವ್ಯಕ್ತಿಯಿಂದ ವ್ಯಕ್ತಿಗೆ ಬೇರೆ ಬೇರೆಯಾಗಿರುತ್ತದೆ. ಆದರೆ ಸ್ಟಾನ್ಟೆನ್ ಅವರು ಕಂಡುಕೊಂಡಿರುವ ಪ್ರಕಾರ, ಮಹಿಳೆಯರು ದಿನನಿತ್ಯ ನಡಿಗೆಯ ಅಭ್ಯಾಸವನ್ನು ರೂಢಿಸಿಕೊಂಡ ಎಂಟು ವಾರಗಳೊಳಗಾಗಿ ಸರಿಸುಮಾರು 14 ರಿಂದ 22 ಪೌಂಡ್ ಗಳಷ್ಟು ತೂಕನಷ್ಟವನ್ನು ಹೊಂದುತ್ತಾರೆ.

ಪುರುಷರು ಇನ್ನೂ ಬೇಗ ತೂಕವನ್ನು ಕಳೆದುಕೊಳ್ಳುತ್ತಾರೆ (ಲೆಕ್ಕಾಚಾರವನ್ನು ಮಾಡಬೇಕೆಂದಿದ್ದಲ್ಲಿ, ನೀವು ಈಗ ಆರಂಭಿಸಿದರೆ, ಮುಂದಿನ ಒಂದೆರಡು ತಿಂಗಳುಗಳೊಳಗೆ ಒಂದೆರಡು ಗಾತ್ರಗಳಷ್ಟು ತೂಕವನ್ನು ನೀವು ಕಳೆದುಕೊಳ್ಳುವ ಸಾಧ್ಯತೆ ಇದೆ). ಇನ್ನಿತರ ವ್ಯಕ್ತಿಗಳು ತೂಕವನ್ನ ಕಳೆದುಕೊಳ್ಳೋದು ಇನ್ನಷ್ಟು ನಿಧಾನವಾಗಿರುತ್ತದೆ ಹಾಗೂ ಕೆಲವರ ಅನಿಸಿಕೆಗಳ ಪ್ರಕಾರ, ಹೀಗೆ ಮಂದಗತಿಯಲ್ಲಿ ತೂಕವನ್ನು ಕಳೆದುಕೊಳ್ಳೋರು ದೀರ್ಘಕಾಲದವರೆಗೆ ತಮ್ಮ ತೂಕನಷ್ಟ ಸ್ಥಿತಿಯನ್ನ ಹಾಗೆಯೇ ಕಾಪಿಟ್ಟುಕೊಳ್ಳಬಲ್ಲರು.

ತೂಕವನ್ನ ಕಳೆದುಕೊಳ್ಳಬೇಕೆನ್ನುವ ನಿಮ್ಮ ಪ್ರಯತ್ನಗಳಿಗೆ, ನಡಿಗೆಯು ನಿಜಕ್ಕೂ ಸಾಥ್ ನೀಡುವಂತಾಗುವುದಕ್ಕೆ, ಕೆಲ ಸಂಗತಿಗಳನ್ನು ನೀವು ನೆನಪಿನಲ್ಲಿಟ್ಟುಕೊಳ್ಳಬೇಕು:

ನೀವೀಗ ನಡೆಯುತ್ತಿರುವುದಕ್ಕಿಂತಲೂ ಹೆಚ್ಚು ಹೆಚ್ಚು ನಡೆಯಲು ಪ್ರಯತ್ನಿಸಿರಿ. ನೀವದೆಷ್ಟು ಪ್ರಮಾಣದ ತೂಕವನ್ನು ಕಳೆದುಕೊಳ್ಳಬಯಸುತ್ತೀರೋ, ಅಷ್ಟು ತೂಕವನ್ನು ಕಳೆದುಕೊಳ್ಳುವುದಕ್ಕಾಗಿ, ನೀವು ಅದೆಷ್ಟು ಹೆಜ್ಜೆಗಳು, ಮೈಲುಗಳು, ಅಥವಾ ಘಂಟೆಗಳು ನಡೆಯಬೇಕೆಂದು ತಿಳಿಸಿಕೊಡುವ ಯಾವುದೇ ಮಾಂತ್ರಿಕ, ಸಿದ್ಧ ಸೂತ್ರವಿಲ್ಲ. ಆರಂಭದ ಹಂತದಲ್ಲಿ, ನೀವೀಗ ಎಷ್ಟು ದೂರ ನಡೆಯುತ್ತಿರುವಿರೋ ಅದಕ್ಕಿಂತಲೂ ಹೆಚ್ಚು ದೂರ ನಡೆಯಲು ಪ್ರಯತ್ನಿಸುವುದೇ ಇಲ್ಲಿ ಮಹತ್ವದ ವಿಚಾರ.

ದಿನವಿಡೀ ನೀವು ಅತ್ತಿತ್ತ ಓಡಾಡುತ್ತಲೇ ಇರಬೇಕಾದದ್ದನ್ನು ಬಯಸುವ ವೃತ್ತಿಯವರು ನೀವಾಗಿದ್ದಲ್ಲಿ, ನಿಮ್ಮ ಪಾಲಿಗೆ ಅಷ್ಟೋ ಇಷ್ಟೋ ನಡಿಗೆ ಸಾಕಾದೀತು, ಆದರೆ ಒಂದೆಡೆ ಕುಳಿತುಕೊಂಡೇ ಕೆಲಸ ಮಾಡುವಂತಹ ಉದ್ಯೋಗಿಯು ನೀವಾಗಿದ್ದಲ್ಲಿ, ರಾತ್ರಿ ಊಟದ ನಂತರ ಕೈಗೊಳ್ಳುವ ನಡಿಗೆಯು ನೈಜ ಫಲಿತಾಂಶಗಳನ್ನು ತೋರಿಸಿಯಾವು’ ಅನ್ನುತ್ತಾರೆ ಸ್ಟ್ಯಾಂಟೆನ್ ಅವರು.

ಆರೋಗ್ಯ ಕಾರಣಗಳಿಗಾಗಿ ದಿನವೊಂದಕ್ಕೆ ಸುಮಾರು 10,000 ಹೆಜ್ಜೆಗಳ ಮೂಲಭೂತ ಪ್ರಮಾಣದಷ್ಟು ನಡಿಗೆಯನ್ನು ಕೈಗೊಳ್ಳಬೇಕೆನ್ನುವುದರ ಬಗ್ಗೆ ಸಾಕಷ್ಟು ಹೇಳಲಾಗಿದೆ. ನಿಮ್ಮ ಗುರಿಯು ತೂಕನಷ್ಟವನ್ನು ಹೊಂದುವುದೇ ಆಗಿದ್ದಲ್ಲಿ, ಒಮ್ಮೆ ನೀವು ನಡಿಗೆಯ ಅಭ್ಯಾಸವನ್ನು ನಿಮ್ಮ ದಿನಚರಿಯನ್ನಾಗಿಸಿಕೊಂಡ ಬಳಿಕ, ನೀವು ಇದಕ್ಕಿಂತಲೂ ಹೆಚ್ಚು ನಡೆಯಲು ಬಯಸುವ ಸಾಧ್ಯತೆಯೇ ಹೆಚ್ಚು. ಆದರೆ, ಆರಂಭದ ದಿನದಂದೇ ಅಷ್ಟೆಲ್ಲ ನಡೆಯಲು ಮುಂದಾಗುವುದು ಬೇಡ.

ನಿಮ್ಮ ಸಾಮರ್ಥ್ಯದ ಕನಿಷ್ಟ ದೂರವನ್ನು ಪ್ರತಿದಿನವೂ ನಡಿಗೆಯ ಮೂಲಕ ಕ್ರಮಿಸಲು ಚಾಚೂ ತಪ್ಪದೇ ಮುಂದಾಗಿ. ಆರಂಭದಲ್ಲಿ ನೀವು ದಿನವೊಂದರಲ್ಲಿ ಕೇವಲ 3,000 ಹೆಜ್ಜೆಗಳಷ್ಟೇ ನಡೆಯುವವರೆಂದಾದಲ್ಲಿ, ಮಾರನೆಯ ದಿನವೇ 10,000 ಹೆಜ್ಜೆಗಳ ನಡಿಗೆಗೆ ಮುಂದಾಗುವುದು ಬೇಡ. ಅಂತಹ ಪ್ರಯತ್ನವು ನಡಿಗೆಯ ಕುರಿತ ನಿಮ್ಮ ಉತ್ಸಾಹವನ್ನೇ ತೊಡೆದುಹಾಕೀತು.

ಬದಲಿಗೆ ಮುಂದಿನ ಒಂದು ವಾರದ ಮಟ್ಟಿಗೆ ಪ್ರತಿದಿನವೂ 5,000 ಹೆಜ್ಜೆಗಳ ನಡಿಗೆಯನ್ನು ಗುರಿಯಾಗಿಟ್ಟುಕೊಳ್ಳಿರಿ. ಅದರ ನಂತರದ ವಾರದಲ್ಲಿ ಪ್ರತಿದಿನವೂ 7,000 ಹೆಜ್ಜೆಗಳ ನಡಿಗೆಯು ನಿಮ್ಮ ಗುರಿಯಾಗಿರಲಿ’ ಎನ್ನುತ್ತಾರೆ ಸ್ಟ್ಯಾನ್ಟೆನ್ ಅವರು. ನಡಿಗೆಯ ಮೂಲಕ ತೂಕವನ್ನು ಕಳೆದುಕೊಳ್ಳುವುದಕ್ಕೆ ನಡಿಗೆಯ ವಿನ್ಯಾಸದಲ್ಲೇ ತುಸು ಬದಲಾವಣೆ ಮಾಡಿಕೊಳ್ಳಬಹುದು. ಅದೇನೆಂದರೆ, ಒಂದಷ್ಟು ಹೊತ್ತಿನವರೆಗೆ ವೇಗವಾಗಿ ನಡೆಯುವುದು ಹಾಗೂ ಬಳಿಕ ನಡುನಡುವೆ ಅಷ್ಟೋ ಇಷ್ಟೋ ಹೊತ್ತು ನಿಧಾನವಾಗಿ ನಡೆಯುವುದು.

ನಡಿಗೆಯ ಅವಧಿಯಲ್ಲಿ ಎಲ್ಲ ಕಾಲದಲ್ಲೂ ಏಕಪ್ರಕಾರದ ವೇಗದಿಂದ ನಡೆಯುವವರಿಗಿಂತಲೂ, ನಡಿಗೆಯ ಅವಧಿಯಲ್ಲಿ ಬೇರೆ ಬೇರೆ ಕಾಲಗಳಲ್ಲಿ ಬೇರೆ ಬೇರೆ ವೇಗಗಳೊಂದಿಗೆ ನಡೆಯುವವರು ಹೆಚ್ಚಿನ ತೂಕವನ್ನು ಕಳೆದುಕೊಳ್ಳುತ್ತಾರೆ ಅಂತಾ ಸಂಶೋಧನೆಯು ಕಂಡುಕೊಂಡಿದೆ. ಟೈಪ್ 2 ಮಧುಮೇಹಿಗಳ ಮೇಲೆ ಕೈಗೊಂಡ ಒಂದು ಅಧ್ಯಯನದ ಪ್ರಕಾರ, ಅವರುಗಳ ಪೈಕಿ, ಪರ್ಯಾಯವಾಗಿ ಮೂರು ನಿಮಿಷಗಳ ಕಾಲ ವೇಗವಾಗಿ ಹಾಗೂ ನಂತರದ ಮೂರು ನಿಮಿಷಗಳ ಕಾಲ ಮಧ್ಯಮ ವೇಗದಲ್ಲಿ ನಡೆದವರ ಶರೀರ ದಾರ್ಢ್ಯವು, ಏಕಪ್ರಕಾರ ವೇಗದೊಂದಿಗೆ ನಡೆದ ಮಧುಮೇಹಿಗಳಿಗಿಂತ ಇನ್ನಷ್ಟು ಉತ್ತಮಗೊಂಡಿತು.

ಹಾಗೂ ಅವರುಗಳ ರಕ್ತದಲ್ಲಿನ ಸಕ್ಕರೆಯ ಮಟ್ಟವೂ ಇನ್ನಷ್ಟು ಉತ್ತಮವಾಗಿ ನಿಯಂತ್ರಣ ಕಂಡಿತು. ಇವೆಲ್ಲವುಗಳ ಜೊತೆಗೆ ಆ ಮೊದಲನೆಯ ವರ್ಗದ ನಡಿಗೆಯವರ ದೈಹಿಕ ಸ್ವರೂಪವೂ ಬದಲಾವಣೆಗೊಂಡು ಅವರ ಹೊಟ್ಟೆಯ ಹಾಗೂ ದೇಹದ ಇತರ ಭಾಗಗಳ ಬೊಜ್ಜು ವೇಗವಾಗಿ ಕರಗಿತು.

ನಿಜಕ್ಕೂ ಒಂದೊಮ್ಮೆ ನೀವು ನಿಮ್ಮ ದೈಹಿಕ ಸ್ವರೂಪವನ್ನು ಬದಲಿಸಿಕೊಳ್ಳಬೇಕೆಂದೇ ಬಯಸುವಿರಾದಲ್ಲಿ, ಪ್ರಾಯಶ: ಚೈತನ್ಯ ತರಬೇತಿಯನ್ನು (ಸ್ಟ್ರೆಂಥ್ ಟ್ರೈನಿಂಗ್) ನಿಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳುವುದರ ಕುರಿತು ನೀವು ಯೋಚಿಸಬಹುದು. ಇದರ ಪ್ರಯೋಜನವೇನೆಂದರೆ, ನೀವು ಇನ್ನಷ್ಟು ವೇಗವಾಗಿ ನಡೆಯುವುದಕ್ಕೆ ಇದು ಸಹಕರಿಸುತ್ತದೆ ಎನ್ನುತ್ತಾರೆ ಸ್ಟ್ಯಾಂಟೆನ್ ಅವರು. ಜೊತೆಗೆ, ಮಾನಸಿಕ ಒತ್ತಡ, ನಿದ್ದೆ, ಹಾಗೂ ಆಹಾರವಿಹಾರಗಳೆಲ್ಲದರ ಸರಿಯಾದ ನಿರ್ವಹಣೆಯೂ ತೂಕನಷ್ಟಕ್ಕೆ ನೆರವಾಗುತ್ತದೆ ಎಂಬುದನ್ನೂ ನೆನಪಿನಲ್ಲಿಟ್ಟುಕೊಳ್ಳಿ.

ನಡಿಗೆಯು ನಿಮ್ಮ ಜೀವನದ ಭಾಗವೇ ಆಗಿರಲಿ. ತೂಕವನ್ನ ಕಳೆದುಕೊಳ್ಳುವುದಕ್ಕೋಸ್ಕರ ಆರಂಭದ ದಿನದಿಂದಲೇ ನೀವು ಪ್ರತಿದಿನವೂ ದಿನಕ್ಕೊಂದು ಘಂಟೆಯಂತೆ ನಡೆಯಲು ಆರಂಭಿಸಲೇ ಬೇಕೆಂದೇನಿಲ್ಲ (ಹಾಗೊಂದು ವೇಳೆ ಅದು ಸಾಧ್ಯವಾದರೆ ಒಳ್ಳೆಯದೇ!!), ಆದರೆ ಪ್ರತಿದಿನವೂ ನಡಿಗೆಯ ಅಭ್ಯಾಸವನ್ನು ರೂಢಿಸಿಕೊಳ್ಳುವುದಂತೂ ತುಂಬಾನೇ ಮುಖ್ಯ. ಹಾಗಾಗಿ, ನಡಿಗೆಯು ನಿಮ್ಮ ದೈನಂದಿನ ಚಟುವಟಿಕೆಗಳ ಭಾಗವೇ ಆಗಿರಲಿ.

ಹಾಗೆ ಮಾಡಿಕೊಂಡಲ್ಲಿ, ಕೆಲವೊಮ್ಮೆ ನೀವು ನಡಿಗೆಯ ಕುರಿತು ಯೋಚನೆಯನ್ನೂ ಮಾಡದ ರೀತಿಯಲ್ಲಿ, ಮಾಮೂಲಿಯಂತೆ ನೀವು ನಡಿಗೆಯನ್ನು ಕೈಗೊಂಡೇ ಬಿಡುವಿರಿ. ವಾರದ ಕೆಲವು ದಿನಗಳ ಮಟ್ಟಿಗೆ ನೀವು ಕೇವಲ 10 ರಿಂದ 15 ನಿಮಿಷಗಳ ಕಾಲವಷ್ಟೇ ನಡೆದರೂ ಸಾಕು. ತಾತ್ತ್ವಿಕವಾಗಿ ಹೇಳಬೇಕೆಂದರೆ, ನೀವು ವಾರದಲ್ಲಿ ಎರಡರಿಂದ ಮೂರು ಬೇರೆ ಬೇರೆ ಅವಧಿಗಳ ನಡಿಗೆಯನ್ನು ಅಥವಾ ಸ್ವಲ್ಪ ದೂರದ, ವೇಗವಾದ, ಹೆಚ್ಚಿನ ತೀವ್ರತೆಯ ನಡಿಗೆಗಳನ್ನು, ಒಂದೆರಡು ಘಂಟೆಗಳ ಅವಧಿಯ ದೂರ ನಡಿಗೆಯನ್ನು ಹಾಗೂ ಉಳಿದ ಸಮಯಗಳಲ್ಲಿ ಸ್ವಲ್ಪ ದೂರದ, ಮಧ್ಯಮ ತೀವ್ರತೆಯ ನಡಿಗೆಯನ್ನು ಕೈಗೊಂಡರೂ ಸರಿ.

ಅಲ್ಪ ದೂರದ ನಡಿಗೆಯನ್ನು ನಿಮ್ಮ ಸಂಗಾತಿಯೊಂದಿಗೆ, ನಿಮ್ಮ ನಾಯಿಯೊಂದಿಗೆ, ನಿಮ್ಮ ಒಡನಾಡಿಯೊಂದಿಗೆ, ಅಥವಾ ನಿಮ್ಮ ತಲೆಯಲ್ಲಿನ ಯೋಚನೆಗಳನ್ನು ಕೊಡವಿಕೊಳ್ಳುವ ನಿಟ್ಟಿನಲ್ಲಿ ನೀವೇ ಒಂಟಿಯಾಗಿ ಕೈಗೊಳ್ಳಲು ಪ್ರಯತ್ನಿಸುವುದೂ ಉತ್ತಮ ಯೋಚನೆಯೇ. ನಿಮ್ಮ ನಡಿಗೆಯ ಚಟುವಟಿಕೆಯನ್ನು ಕೇವಲ ನಡಿಗೆಯ ವೇಳೆಗಷ್ಟೇ ಸೀಮಿತಗೊಳಿಸಬೇಡಿ. ಯಾವಾಗಲೆಲ್ಲ, ಎಲ್ಲಿ ಎಲ್ಲ ಸಾಧ್ಯವಾಗುತ್ತದೆಯೋ ಆವಾಗಲೆಲ್ಲ, ಅಲ್ಲೆಲ್ಲ ನಡೆಯಲೇ ಪ್ರಯತ್ನಿಸಿ.

ಸಾಧ್ಯವಾದಷ್ಟು ಮೆಟ್ಟಿಲುಗಳನ್ನೇ ಬಳಸಿರಿ ಎಂಬ ಸಲಹೆಯು ಅದೆಷ್ಟು ಚಿರಪರಿಚಿತವಾದದ್ದೆಂದರೆ, ಆ ಸಲಹೆಯನ್ನು ಕೇಳಿ, ಕೇಳಿ ಕೊನೆಗೆ ಆ ಸಲಹೆಯನ್ನೇ ನಿರ್ಲಕ್ಷಿಸಿಬಿಡುವಷ್ಟು. ಆದರೆ, ಇಲ್ಲಿ ಒಂದು ಅಂಶವನ್ನು ಗಮನಿಸಬೇಕು. ಸಮತಟ್ಟಾದ ಮೇಲ್ಮೈ ಮೇಲಿನ ನಡಿಗೆಗಿಂತ ಮೆಟ್ಟಿಲುಗಳನ್ನೇರುವ ಕ್ರಿಯೆಯು ಹೆಚ್ಚಿನ ಕ್ಯಾಲರಿಗಳನ್ನು ದಹಿಸುತ್ತದೆ ಹಾಗೂ ಕಾಲುಗಳ, ಮೀನಖಂಡಗಳ ಮಾಂಸಖಂಡಗಳನ್ನು ವಿಕಾಸಗೊಳಿಸುತ್ತದೆ.

ಬೆಟ್ಟವೊಂದನ್ನು ಕಂಡುಕೊಳ್ಳಿ. ಎಕ್ಸರ್ಸೈಸ್. ಕಾಮ್ ನಲ್ಲಿ ಸರ್ಟಿಫ಼ೈಡ್ ಆಂಡ್ ಕಂಡೀಷನಿಂಗ್ ಸ್ಪೆಷಲಿಸ್ಟ್ ಹಾಗೂ ತರಬೇತುದಾರರ ಮುಖ್ಯಸ್ಥರೂ ಆಗಿರುವ ಟೈಲರ್ ಸ್ಪ್ರೌಲ್ ಅವರು ಹೇಳುವ ಪ್ರಕಾರ, ಇಳಿಜಾರು ಮೇಲ್ಮೈ ಮೇಲಿನ ನಡಿಗೆಯು ನಿಮ್ಮ ಹೃದಯ ಬಡಿತವನ್ನು ಹೆಚ್ಚಿಸುತ್ತದೆ ಹಾಗೂ ನಿಮ್ಮ ಪೃಷ್ಠಭಾಗದ, ತೊಡೆಗಳ ಮುಂಭಾಗದ, ಹಾಗೂ ಮೀನಖಂಡಗಳನ್ನು ಸಕ್ರಿಯಗೊಳಿಸುತ್ತದೆ.

ಇಳಿಜಾರಿನ ಪ್ರಮಾಣವನ್ನು ಅವಲಂಬಿಸಿ, ನಿಮ್ಮ ಕಾಲ ಮಣಿಗಂಟುಗಳಿಗೆ ಒತ್ತಡವನ್ನು ಹೇರದ ರೀತಿಯಲ್ಲಿ, ಓಟದಿಂದ ನೀವು ಪಡೆದುಕೊಳ್ಳಬಹುದಾದಂತಹದ್ದೇ ಪ್ರಯೋಜನಗಳನ್ನು ಈ ಇಳಿಜಾರು ಮೇಲ್ಮೈಯನ್ನು ಏರುವುದರ ಮೂಲಕ ನೀವು ಪಡೆದುಕೊಳ್ಳಬಹುದು ಎಂದಿದ್ದಾರೆ.

ಜಾಗಿಂಗ್ ಮತ್ತು ಓಟದಿಂದ ನಿಮ್ಮ ಕಾಲುಗಳ ಮಂಡಿಗಳ ಮೇಲಾಗುವ ಉಪಯೋಗ ಸಂಬಂಧೀ ಹಾನಿಗೊಳಗಾಗದ ರೀತಿಯಲ್ಲಿ, ಜಾಗಿಂಗ್ ಮತ್ತು ಓಟದ ಮೂಲಕ ನೀವು ನಿಮ್ಮದಾಗಿಸಿಕೊಳ್ಳಬಹುದಾದ ಎಲ್ಲ ಪ್ರಯೋಜನಗಳನ್ನು ಪಡೆದುಕೊಳ್ಳಲು ಹಾಗೂ ನಿಮ್ಮ ಹೃದಯ ಹಾಗೂ ರಕ್ತಪರಿಚಲನಾ ವ್ಯೂಹಕ್ಕೆ ಅತ್ಯಗತ್ಯವಾದ ಪಂಥಾಹ್ವಾನವನ್ನು ಅಧಿಕಗೊಳಿಸಿಕೊಳ್ಳಲು ನಿಮ್ಮ ನಡಿಗೆಯ ಪಥದ ಇಳಿಜಾರನ್ನು ಹೆಚ್ಚು ಮಾಡಿಕೊಳ್ಳುವುದು ಅತ್ಯುತ್ತಮ ಮಾರ್ಗೋಪಾಯವಾಗಿದೆ ಎಂದು ಅವರು ಹೇಳುತ್ತಾರೆ.

ಇಳಿಜಾರನ್ನೇರುವಾಗ ನೀವು ಹೂಡಬೇಕಾಗುವ ಆ ಹೆಚ್ಚುವರಿ ಪ್ರಯತ್ನವು, ಇನ್ನಷ್ಟು ಕ್ಯಾಲರಿಗಳನ್ನು ದಹಿಸುವಲ್ಲಿ ನಿಮಗೆ ನೆರವಾಗುತ್ತದೆ ಹಾಗೂ ನಿಮ್ಮ ದೇಹ ತೂಕ ಹಾಗೂ ಹೃದಯದ ಸಹಿಷ್ಣುತೆಯ ಸಾಮರ್ಥ್ಯವನ್ನವಲಂಬಿಸಿ, ನೀವು ಇನ್ನಷ್ಟು ಕೊಬ್ಬನ್ನು ಕರಗಿಸಿಕೊಳ್ಳಬಹುದು’ ಎಂದೂ ಅವರು ಸೇರಿಸುತ್ತಾರೆ.

ಯಾರೋ ಓಟಗಾರನ ಮೇಲರಿಮೆಯು ನಿಮ್ಮನ್ನು ಹಿಂಜರಿಯುವಂತೆ ಮಾಡದಿರಲಿ. ಘಂಟೆಗೆ 5 ಮೈಲುಗಳ ವೇಗದಲ್ಲಿ ನೀವು ನಡೆದರೆ, ಅಷ್ಟೇ ವೇಗದಲ್ಲಿ ಜಾಗಿಂಗ್ ಮಾಡುವವರಿಗಿಂತಲೂ ಅಧಿಕ ತೂಕನಷ್ಟವನ್ನು ನೀವು ಹೊಂದುವಿರಿ – ತರಬೇತಿ ಮತ್ತು ಅಭ್ಯಾಸದಿಂದ ಇದನ್ನು ಸಾಧಿಸಬಹುದು ಎನ್ನುತ್ತಾರೆ ಸ್ಟ್ಯಾಂಟೆನ್ ಅವರು.

ಸಾಮೂಹಿಕ ನಡಿಗೆಯ/ಜಾಗಿಂಗ್ ನ ಆಯೋಜನೆಗಳಲ್ಲಿ ಭಾಗವಹಿಸಿರಿ. ಸಾಮೂಹಿಕ ನಡಿಗೆ/ಜಾಗಿಂಗ್ (ಮ್ಯಾರಥಾನ್ ಓಟ) ನಂತಹ ಆಯೋಜನೆಗಳೇ ನಡಿಗೆಯನ್ನು ಕೈಗೊಳ್ಳಲು ಜನರಿಗೆ ಸ್ಪೂರ್ತಿಯನ್ನುಂಟು ಮಾಡುವುದು ಎನ್ನುತ್ತಾರೆ ಸ್ಟ್ಯಾಂಟೆನ್. ಐದು ಸಾವಿರ ಅಥವಾ ಹತ್ತು ಸಾವಿರದಷ್ಟು ಜನರನ್ನೊಳಗೊಂಡ ಮ್ಯಾರಥಾನ್ ಗಳು ನಡಿಗೆಯನ್ನು ಪ್ರೇರೇಪಿಸುವಂತಹವು. ಬಹಳಷ್ಟು ಸಂಸ್ಥೆಗಳು ವರ್ಚುವಲ್ ರೇಸ್ ಗಳನ್ನು ಆಯೋಜಿಸುತ್ತಿದ್ದು, ನೀವಂದುಕೊಳ್ಳುವುದಕ್ಕಿಂತಲೂ ಇವು ಹೆಚ್ಚು ವಿನೋದಭರಿತವಾಗಿರುತ್ತವೆ ಹಾಗೂ ಅನೇಕ ಬಾರಿ ನೀವು ಟಿ-ಷರ್ಟ್ ಅನ್ನೋ ಪದಕವನ್ನೋ ಗೆಲ್ಲುವ ಅವಕಾಶಗಳೂ ಇರುತ್ತವೆ.

ಅರ್ಧ ಮ್ಯಾರಥಾನ್ ಅನ್ನು ಪೂರೈಸುವ ಸಾಮರ್ಥ್ಯ ನನಗಿದೆ ಎಂದು ಅನೇಕ ಮಂದಿಗೆ ತಿಳಿದೇ ಇರುವುದಿಲ್ಲ ಎನ್ನುತ್ತಾರೆ ಸ್ಟ್ಯಾಂಟೆನ್ ಅವರು. ಆ ಕಾರಣಕ್ಕಾಗಿ ಕೆಲವೊಂದು ರೇಸ್ ಗಳು ಇತರ ರೇಸ್ ಗಳಿಗಿಂತ ಉತ್ತಮವಾಗಿರುತ್ತವೆ. ಒಂದು ವೇಳೆ, ಖುದ್ದು ನೀವೇ ಭಾಗವಹಿಸಬೇಕಾಗಿರುವಂತಹ ಆಯೋಜನೆಯು ಅದಾಗಿದ್ದಲ್ಲಿ, ಟೈಮ್ ಕಟಾಫ಼್ ಗಳನ್ನು ಜಾಗರೂಕವಾಗಿ ಪರಿಶೀಲಿಸಿಕೊಳ್ಳಿರಿ.

ನಿಮ್ಮ ಹೃದಯಬಡಿತವನ್ನು ಹೆಚ್ಚಿಸಿಕೊಳ್ಳಿರಿ. ನೀವು ಓಡುವುದೇನೂ ಅಗತ್ಯವಿಲ್ಲವಾದರೂ ಕೂಡ, ನಿಮ್ಮ ನಡಿಗೆಯ ವೇಗವನ್ನು ಚುರುಕುಗೊಳಿಸುವುದರಿಂದ ನಿಮ್ಮ ಹೃದಯದ ಬಡಿತದ ವೇಗವು ಹೆಚ್ಚಿ, ಆ ಮೂಲಕ ಅಧಿಕ ಕ್ಯಾಲರಿಗಳನ್ನು ದಹಿಸಲು ಸಾಧ್ಯವಾಗುತ್ತದೆ. ವೇಗವನ್ನು ಸಾಧಿಸಲಾಗದಿದ್ದರೆ ಚಿಂತೆ ಬೇಡ. ಮಧ್ಯಮ ವೇಗದ ನಡಿಗೆಯಿಂದಲೂ ಶರೀರಕ್ಕೆ ಅಗತ್ಯವಾದ ಉತ್ತಮ ವ್ಯಾಯಾಮವು ಲಭಿಸುತ್ತದೆ.

ಸೆಂಟರ್ಸ್ ಫ಼ಾರ್ ಡಿಸೀಸ್ ಕಂಟ್ರೋಲ್ ಆಂಡ್ ಪ್ರಿವಿನ್ಷನ್ (ಸಿಡಿಸಿ) ನ ಪ್ರಕಾರ, ನಿಮ್ಮ ಹೃದಯ ಬಡಿತದ ಗರಿಷ್ಟ ದರದ ಶೇ. 50 ರಿಂದ ಶೇ. 70 ರಷ್ಟು ಹೆಚ್ಚಿಸಿಕೊಳ್ಳುವ ಮೂಲಕವೂ ಮಧ್ಯಮ ತೀವ್ರಸ್ವರೂಪದ ನಡಿಗೆಯನ್ನು ನಿಮ್ಮದಾಗಿಸಿಕೊಳ್ಳಬಹುದು. ಹಾಗಿದ್ದರೆ ನಿಮ್ಮ ಶರೀರಕ್ಕೆ ಅಗತ್ಯವಾಗಿರುವ ಈ ಮಧ್ಯಮ ತೀವ್ರಸ್ವರೂಪದ ನಡಿಗೆಯನ್ನು ನೀವು ಸಾಧಿಸಿಕೊಂಡಿರುವುದನ್ನು ಪರಿಶೀಲಿಸುವುದೆಂತು.

ಹಾರ್ಟ್ ರೇಟ್ ಮಾನಿಟರ್ ಅನ್ನೋ ಇಲ್ಲವೇ ಹಾರ್ಟ್ ರೇಟ್ ಮಾನಿಟರ್ ಅನ್ನು ತನ್ನೊಳಗೆ ಅಡಕವಾಗಿಸಿಕೊಂಡಿರುವ ಆಕ್ಟಿವಿಟಿ ಟ್ರ್ಯಾಕರ್ ಅನ್ನೋ ಬಳಸಿಕೊಂಡು ನೀವು ನಿಮ್ಮ ಹೃದಯ ಬಡಿತದ ತೀವ್ರತೆಯನ್ನು ಪರಿಶೀಲಿಸಿಕೊಳ್ಳಬಹುದು. ಈ ಮಾಹಿತಿಯು ನಿಮಗೆ ಇಷ್ಟವಾಗಿದ್ದರೆ ಮರೆಯದೇ ನಿಮ್ಮ ಸ್ನೇಹಿತರೊಂದಿಗೆ ಹಂಚಿಕೊಳ್ಳಿ. ಒಳ್ಳೆಯ ವಿಷಯಗಳನ್ನು ಹಂಚಿಕೊಳ್ಳುವುದು ಸಹ ಒಂದು ಒಳ್ಳೆಯ ವಿಷಯ. ಹಾಗೆಯೇ ಮರೆಯದೆ ನಮ್ಮ ಪೇಜ್ ಅನ್ನು ಲೈಕ್ ಮಾಡಿ ಹೆಚ್ಚಿನ ಅಪ್ಡೇಟ್ ಗಳನ್ನು ಪ್ರತಿದಿನ ಪಡೆಯಿರಿ.

LEAVE A REPLY

Please enter your comment!
Please enter your name here